Sadə oğlanam, sadə saat taxıram mən

Sadə saatlı sadə oğlan İlham Əliyev

Bloqqer Vəfa Cəfərovanın hazırladığı və “Azadlıq” qəzetinin tirajladığı “İlham Əliyevin saatı neçə(yə)dir?” məqaləsinə bugün Prezident Aparatının mətbuat xidmətindən reaksiya gəlib: “Prezident İlham Əliyev qəzetin təsvirinə qətiyyən uyğun gəlməyən, adi metaldan hazırlanmış, sadə və bahalı olmayan saat bağlayır. Cənab Prezident təbiətcə təvazökar olduğuna görə, həyatda və davranışında hər zaman sadəliyə üstünlük verir”

Açıqlamada təkcə İlham Əliyevin sadə oğlan olmasına işarə etmirlər, həm də “Azadlıq” qəzetini 3 gün içində təkzib verməsələr, məhkəməyə verməklə hədələyirlər. Hədələnən ancaq “Azadlıq” qəzetidir. Çünki bu ölkədə “İlham Əliyevin pulunu saymağa cəsarət edən” tək qəzet də elə “Azadlıq”dır.

İlham Əliyevin sadə oğlan olduğunu çox görmüşdük. Amma bunun rəsmi açıqlama ilə təsdiqləndiyini görməmişdik. Sadə oğlan İlham sadə kostyum geyinir, sadə maşın olan minik avtobusu sürür, sadə idman növü turnikdə dartınır və nəhayət oğluna Dubayda çox sadə bir villa alıb. Ən nəhayət sadə(yəni yağsız) xörək yediyini xalqına açıqlayıb.

Çox gözəl. Yaxşı 800 minlik saat yox, “sadə saat” taxırsa bunu da xalqına açıqlasın. Fotosunu və saatın xarakteristikalarını yaysınlar. Biz də bilək sadə oğlanın sadə saatının necə və neçəyə olduğunu?

800 000 dollarlıq saat haqqında təkzib verən PA mətbuat xidməti bir şeydə yanılmayıb. Saat doğurdan da “sadə konstruksiyalı”dır. 6 parçadan ibarət sadə konstruksiyalı saatı yığmaq üçün 10 ay vaxt lazım olur. Yəqin bu səbəbdən PA açıqlamasında saat ancaq “sadə” kimi göstərilib. Açıqlamada nə qiymət var, nə marka adı.

Bu arada AZTV də prezidentin saatına sadəlik donu geydirib. Buna fotoşop demirəm. Xalqa verilən “sadəlik nümunəsi” deyirəm. 

Sadə saat əhvalatından sonra ağla ilk gələn Mübariz Mustafayevin bir zaman oxuduğu xit - “Sadə qız axtarıram” mahnısı yada düşür. “El oğlu” keçmişdə qaldı. Sadə oğlanın şərəfinə sadə mahnı dinlənilməli.

Yazı bəlkə zarafatdır, amma ortada bir ciddi məqamın olduğunu ortaya çıxardı. Bu məlumat düz  3 gündür internetdə fırlanır. PA-dan reaksiya verən yox idi. Amma aprelin 24-ü, bugün “Azadlıq” qəzetində çap olunan kimi münasibət bildirildi.

Artıq ortada inkar edilməz fakt var. Bir zamanlar Heydər Əliyevin hər gün “Azadlıq” qəzeti oxuduğu kimi İlham Əliyev də “Azadlıq” oxuyur. Müxalifəti nə qədər alçaltsa da, rusdilli, ingilisdilli olsa da, o, “Azadlıq” oxuyur.