Başlanğıc...

Paz-zollayaninin köşəsi

суббота, 13 апреля 2013 г.

Oğrunun doğruya bağırması


Əliyevlər ailəsinin növbəti ofşor qalmaqalı çıxdı. Çıxdı. Amma kimsə təəccüblənmədi. Oğrunun oğru olduğu, Azərbaycanın sərvətlərinin planetin ən kiçik nöqtələrində gizlədildiyi zatən hər kəsə bəlli idi. 

İfşa məsələsinə gəldikdə Əliyevlər ifşa olunmaqdan yoruldu, mətbuat ifşa etməkdən yox. Artıq 2010-cu ildə dünya mediasında çıxan Dubay villaları qalmaqalı faktı qarşısında olduğu kimi şok və qəzəb içində deyillər. Prezident Aparatı səviyyəsində biznes maxinasiyasını təsdiqləyirlər. Qınamaqdan keçib məsələyə təhlil gözü ilə baxaq. 

Azərbaycan adlı obyekt Əliyevlərə məxsusdursa, nə üçün bu mülkü dünyanın o başında  sənədləşdirirlər? Burda sənədləşdirib, şirkətləri ilə bağlı bütün məlumatı məxfiləşdirə bilərdilər. Etməyiblər. Böyük qardaşları Rusiyaya da etibar etməyib, Panamanı, Vircin adalarını seçiblər. Məsələ ondadır ki, Əliyev ailəsinin bir il sonra Azərbaycanda qalıb qalmayacağı bağlı gələcəyə etibarı yoxdur. Sonun mümkün ehtimalını hakimiyyətə gəldikləri 2003-dən düşünüblər. 

Sual oluna bilər ki, inqilab olsa adlarına özəlləşdirdikləri zavodları, mədənləri bellərinə sarıyıb aparan deyillər ki? Elədir. Ancaq düşünün ki, hüquqi dövlət qurduq. Dubaydakı mənzilində oturan Leyla Əliyeva beynəlxalq məhkəməyə baş vurur. Vaxtilə özəlləşdirdiyi bütün əmlakın hüquqi varisliyini,  gəlirlərini tələb edir. Biz də demokratik dövlətik, axı. Zülfüqarlı qardaşlarını dama basıb zavodlarını əlindən alan kimi kimsənin var-yoxunu ala bilmərik. 

Tək yol qalır. O da boşevizm. Yəni bütün hüquqi baryerləri heçə sayıb, əmlakı tam müsadirə. Belə bir gələcək mümkündür. Qərb israr edərsə. Ancaq onu deyim ki, Qərb də artıq diktatorların var-yoxuna hörmət eləmir. Qəddafi Liviyanın neft pulları ilə İtaliya, İsveçrə şirkətlərinin yarısını almışdı. Qarajınacan müsadirə etdilər. Qəddafinin sərvəti gəbərəndən sonra açıqlanmışdı. Əliyevlər ailəsinin sirlərinin indidən açıb tökürlər. Dünya çox kiçikdir. Nə qaçmağa, nə də gizlətməyə yer qoyublar.

Ofşor sirləri oğurluq milyardlarla yanaşı bir həqiqəti də ortaya çıxardı. İlham Əliyevin qızlarından başqa ətrafında güvənəcəyi bircə adamının olmaması reallığını. Bir tərəfdən fikirləşirsən, o boyda prezident çirkli biznes maxinasiyalarında qızlarının adının keçməsinə niyə razı olur ki? Keçirərdilər N familiyalı bir tanışın adına, yola verərdilər. Bizlər mentalitet söhbətinə görə yazmırdıq, Qərb ki, belə şey qanmır. Görünür, o bir nəfər də yoxdur. Doğrusu, bir insan kimi İlham Əliyevə acıdım və ilk dəfə ona yaxşı bir şey arzuladım. Sizə Allahdan canınızı deyil, heç olmasa malınızı tapşıracaq etibarlı dost arzulayıram, cənab prezident. Bircə dost.

Hakimiyyət vəkillərinin ofşor eybini örtmək cəhdləri lap maraqlıdır. Deputat Azay Quliyev:"Prezidentin qızları biznesmen ailənin üzvləridir. Bunu prezidentin adına yazmaq doğru deyil". Ailə biznesi İlham Əliyevin deyilsə, demək Araz Ağalarovundur. Araz Ağalarov isə Rusiya vətəndaşı, Putinin Əliyevə qarşı yaratdığı "Milyarderlər ittifaqı"nın üzvüdür. Azay Quliyevin məntiqi ilə getsək Azərbaycanın sərvəti Araz Ağlarovun cibində, Araz Ağalarov isə Putinin ovcundadır. Bədbəxtçilik ondadır ki, rus qoşunları sərhədi keçmədən Azərbaycanın mülk kimi Rusiyanın əlində olması görüntüsü yaradılır. Nə deyirəm. Məntiqinizə quzu kəsim.

Комментариев нет:

Отправка комментария