Cənnət Şuşa, cəhənnəm Bakı

Şuşanın işğalının ildönümü ilə əlaqədar mia.az saytı hal-hazırki Şuşanın fotolarını yayımlayıb. Desəm ki, içim sızladı İlham Əliyevdən fərqim olmaz. Əksinə sevindim. Şuşa mənə itirdiyimiz cənnəti xatırladı. Cənnət diyar Qarabağı yox. SSRİ-nin qoyub getdiyi, müstəqillikdən sonra öz azərbaycanlımızın əli ilə məhv etdiyi yaşıl cənnətini. İşğal olunub zorlanmış köhnə Bakını. Bakı ilə doymayıb məhv edilən yaşıl rayonları.

İndiki Şuşa başdan-başa yaşıllıqdır. Bəli, bu insan əli dəyməyən yaşıllıqdır. Ancaq bir insanın içində yaşaya biləcəyi ən ideal mühitdir. Şuşanın meşələri qırılmayıb. Dağları kilometrlərcə hasarlanmayıb. Ortasına milyonluq villalar əkilməyib. Ağacları qırıb hər küncdə bir obyekt tikməyiblər. Ermənilər satıb yox, atıb getdiyimiz Şuşanı 20 il sonra olduğu kimi saxlayıblar. SSRİ dövründə qurulmuş yol nişanlarına belə əl dəyilməyib.

Torpağın kimin ərazisi olmasının əhəmiyyəti yoxdur. O torpağı cənnət edən də, arzu edilən ölkəyə çevirən də üstündəki insandır. Almanlar günəşli günlərin azlığına görə yay istirahətini Tükiyədə keçirirlər. Amma on türkdən altısı, on azərbaycanlıdan doqquzu Almaniyada yaşamaq istəyər. Çünki Almaniyanı Almaniya edən almandır, bir başqası yox.

Füzulidən fotolara baxıram. Dağıdılmış universam, univermaq, dağılmış bazar. Universitet, kitab mağazası, elmi institut yox, məhz bazar. Sadəcə isimlərinin müasirliyi ilə fərqlənən 3 bazar. İşğaldan qabaq bircə məktəb tikilib, o da fundament halında qalıb. 

İndi erməni bu bazarları dağıtmaqla, bazar təfəkkürlü insanları qovmaqla pislik edibmi? Özü üçün qətiyyən yox.

Erməni etdiyi pisliyi ancaq burdakılara edib. Çünki o bazar təfəkkürlü insanlar Bakıya gəlməklə meşə salmadılar. Olan qalan ağacı da kəsib yerinə bazar tikdilər. Cənnəti atıb, başqaları üçün cəhənnəm inşa etdilər. Təbriz (keçmiş Çapayev) küçəsindən keçənlər yəqin "Şuşa" restoranı ilə qarşılaşıb. Bakının o səmti tək-tük yaşıllıq olan yerlərdən biridir. Amma Allah bilir o restoranı tikəndə nə qədər ağac kəsiblər. Və onun nümunəsində kəsilmiş ağacların yerində ucalan yüzlərlə kafe, restoran, sauna.

Qarabağın yaşıl meşələri, göy çəmənləri olduğu kimi qalıb. Bakıda viran edilən məscidlərin əksinə müsəlman məscidi yerindədir. Kimlərki hay-həşir salıb "ay erməni meşələrimizi qırır" deyir, qələt edir. Bu o şəxslərdir ki, Ziya Məmmədovun Qubada, Kəmaləddin Heydərovun Qəbələdə hasara saldığı hektarlarca meşəni görəndə gözü kor, dili lal olur. Mən fotolarda Şuşanın dağlarını sovet filmlərində olduğu kimi gördüm. Amma uşaq vaxtı istirahət üçün getdiyim Qubanı indi tanıya bilmirəm.

Gün olacaq bu ölkəyə humanist, demokratik hökümət başçılıq edəcək. O hökümət Qarabağ üzərində hərbi gücünü bərpa edəcək. O gün biz nəyi itirdiyimizin fərqinə varacayıq. Və o zaman anlayacağıq ki, cənnət olan Qarabağ deyilmiş. Ermənisiz, öz əlimizlə cəhənnəmə çevirdiyimiz itirilmiş Azərbaycanmış.