Başlanğıc...

Paz-zollayaninin köşəsi

четверг, 12 декабря 2013 г.

Sübhü açılmayanlar



Mustafa Sübhi küçəsinin adının Şeyxülislamın bir göstərişi ilə dəyişdirilməsindən yəqin ki, xəbəriniz var. Ancaq bu hadisədə bir şey təəssüfləndirdi. Az qala Məhəmmədhəsən kişinin dağda ölən eşşəyi haqda bəyanat verən partiyalar məsələyə səssiz qaldı.

Küçənin adı ona görə dəyişdirilib ki, Mustafa Sübhi adlı şəxs Allahşükürə ləzzət eləmirmiş. Sübhi türk kommunisti, əqidəcə ateistmiş. Vampir sarımsaqdan qaçan kimi, molla da ateistdən ürkər. Maksimal komfortun təmin edilməsi üçün şeyx həzrətləri tərəfindən Hacıbala Abutalıbova müraciət edilib. Elə səhəri gün prezident səviyyəsində müraciətə cavab verildi. Şeyxin arzusu təmin olundu. Küçəyə  şeyx üçün məscid tikən Nabat Aşurbəyovanın adı verildi.

Dindar-ateist, sağçı-solçu, kommunist-müsavatçı söhbətlərini qoyuram bir kənara. Ortada dünyəvi dövlət prinsipinin heçə sayıldığı vəziyyət var. Dinin dövlətdən ayrı olduğu dövlətdə dini rütbəli şəxs göstəriş verir. Dərhal onun istəyinə uyğun ali hakimiyyət səviyyəsində cavab verilir. Molla dövlət başçısını zövqünə görə idarə edir. Deyək ki, İlham Əliyev gözə kül üfürür. Kiməsə xoş gəlmək üçün sökdüyü, adını dəyişdirdiyi tarixi obyekt az olmayıb. Bəs müxalifət niyə susur?

Bu gün şəxsi iradəsini hakimiyyətə qəbul etdirən dini məmur sabah hakimiyyət olacaq müxalifəti dolamazmı? Naxırçı kəndirli dananı əlinə dolayan kimi dolayar. Keçən il bu vaxtlar Allahşükür Paşazadə vicdan azadlığının nə olduğunu bilmədiyini demişdi. Vicdan azadlığı odur ki, vətəndaşlar istədikləri dinə sitayiş edə bilər və ya heç bir dini inancı qəbul etməmək hüququna malikdirlər. Eyni zamanda hər iki tərəfin bir-birinin inanc haqqına hörmət bəsləməsi.


Şeyxülislam vicdan azadlığı hüququndan bixəbər adamdır. Olsaydı Mustafa Sübhinin şəxsiyyəti onu narahat etməzdi. Qanunpərvər  vətəndaş kimi Sübhiyə də dözümlülüklə yanaşardı. Ya  siyasilər? Gündə azı on kərə demokratiya, mətbuat, vicdan azadlığı zikr edən bəndələrin öz dediklərindən xəbəri varmı? Varsa nədən və ya kimdən qorxurlar? Bəlkə beyinləri tormozlayır...

Türkiyədə bənzər hal baş versəydi mütləq siyasi reaksiya gələrdi. Vətəndaşlarımız siyasəti türk kanallarına baxıb öyrənirsə, buna təəccübləməyin. Bu heç də müxalifətin televiziyaya buraxılmaması ilə bağlı deyil. Hakimiyyətin intellekt sarıdan nə mal olduğunu hamımız bilirik. Bəs əldə olan virtual KİV-dən camaat nə öyrənsin? Müsavat-AXCP qeybəti.

Küçənin adının dəyişdirilməsi ilə bağlı sıravi müsavatçının reaksiyası - "Bizi maraqlandırmır Sübhi. O adam kommunist olub. Bizə nə?" Filankəsdən bizə nə deyirlər, amma bütöv bir xalqın başına hakim kəsilmək istəyirlər. 28 may metro stansiyasında Rəsulzadənin barelyefi söküləndə hay-küyləri aləmi götürmüşdü. Ancaq İlham Əliyev sovet adına incəsənət abidələrini yerlə-yeksan edəndə, adlarını dəyişəndə gözlərini döymüşdülər. Üstəlik sevinmişdilər. Yaxşı, o götürülən heykəllərə qoyun mütiliyi ilə dözdünüzsə, sökülən barelyefə niyə etiraz edirsiniz? Olmaya Məkkə kafirləri kimi o daşların içində ruhların var olduğuna inanırsınız?!

Azərbaycanda niyə inqilab olmur? yaxud Azərbaycan niyə inqilabçı yetişdirmir? sualına bir cümlə ilə cavab vermək olar. Bizdə siyasət ənənəçilik üzərində qurulub. Tarix isə heç yerdə ənənəçiləri inqilabçıya çevirməyib. Beyinlərdə inqilab belə hallara siyasi reaksiya ilə cücərir. O partiyalar ki, 100 il əvvəlin zehniyyəti ilə düşünür və başqa dəyərləri heçə sayır, onların yeri tarixin zibilxanasıdır. 

Kommunist, ateist Sübhinin adına müdafiə etsəm də, Allah inancından heç vaxt əksik olmamışam. Ən azı ona görə ki, Allahın özü aramızda olmasa da, ədalətinin işarələrini görə bilirik. O, ədaləti öz nəfsi ilə ölçənləri heç zaman xalq başına hakim qılmaz. 20 ildir kimi vəzir, kimi rəzil etdiyi ortada. Nəfsi ilə yaşayan toplumların başına Əliyevlər ailəsi kimi Təpəgöz oturdub bir-bir uşaqlarını yeyər. Dünən adı yox edilən Mustafa Sübhi başqasının uşağı idi. Sabah növbə sizin uşaqlarınızdadır.

Комментариев нет:

Отправить комментарий