Bloq necə yazılmalıdır

Bloq açan, ilk yazısını yazmaq istəyən hər kəs özünə bu sualı  verir. Alver kimi bu sahə də bəzən tutur, bəzən tutmur. Xüsusi ədəbi istedada malik deyilsizsə, aşağıdakı məsləhətlərdən istifadə edin:

1. İlk yazılarınızı qısa yazın. Maksimum 1500 işarə. Qısa yazı qamburqer kimidir. Tez və rahat yeyilir. Dadlı olmasını istəyirsizsə, məzmuna hislər yox, yumor qatın. 

2. Qısa cümlələrlə yazın. Ürəyinizdən keçən deyil, oxucunun anlayacağı şəkildə yazın. Ən azı mübtəda və xəbərin yerini düz qoyun. 

3. Yazını saytın redaktə səhifəsinə atamamışdan öncə Worddə yazın. Şriftləri aydın görmək, daha yaxşı redaktə imkanınız olacaq.

4. Worddə yazdıqdan sonra mütləq artıq ifadələri, iki dəfə işlənmiş eyni mənalı sözləri çıxarın. Səhvləri düzəldin. Yazını məzmuna görə abzaslara ayırın.

5. Öz yazı üslubunuzu yaratmaq istəyirsinizsə, emosiyalarınıza deyil, gözünüzə güc verin. Ruhunuza daha yaxın olan köşə yazarlarının yazılarını davamlı oxuyun. Mən üslubumu formalaşdıranadək "Azadlıq"ın köşə yazarı Natiq Güləhmədoğlu və Elnur Astanbəylinin yazılarını oxumuşam.

6. Tənqidi mövzuda yazacaqsınızsa, özünüzü təmizə çıxarmağı, etiraflar etməyi unudun. Bu sizi zəif göstərir. Yazı isə süni çıxır.

7. "Mən nə ondanam, nə bundan" tipli cümlələri ümumiyyətlə işlətməyin.

8. Ancaq fotodan ibarət bloq açacaqsınızsa, ondansa açmayın. Baxıb üstündən keçəcəklər. Fotolarla zəngin bloqlar o zaman oxunur ki, hər foto altında informativ izahat olur.

9. Məktəb dərsliklərindəki "Giriş" hissəsini bloqdan uzaq tutun. Birbaşa mövzuya girin.

10. Siyasi mövzuda qısa yazılar yazacaqsınızsa, "Eşq olsun bəy!" ruhunda yazın. Onlar fərəhlə oxunur, sunami kimi paylaşılır. Təzə başlayanlar üçün məsələhətlidir. Zirvəni fəth etmək hədəfiniz varsa, çalışın başqa mövzulara keçin.

11. Təhlil yazırsınızsa, oxucu ilə söhbət edər  kimi  yazın. AZTV, ANS formallığından uzaq durun. Oxucuya suallar verin. Ardınca cavabı izah edin. Hansısa xəbərin geniş izahata ehtiyacı varsa, söz xərcləməyin. Link qoyun.

12. Yazı uzun alınıbsa...

a. Oxucunu yormamaq üçün bloq redaktə səhifəsində abzaslar arasında məsafə qoyun.

b. Şriftlər rahat oxunacaq şəkildə olsun. Nə çox kiçik, nə çox böyük.

c. Abzasların arasına mövzunu təsvir edəcək fotolar yerləşdirin. Hamısı eyni ölçüdə, eyni istiqamətdə olmasa da olar. Biri kiçik, digəri geniş. Yaxud biri sağda, digəri solda.

d. Abzasları 4-5 sətrdən uzun yazmayın.

13. Kiməsə lağ edəcək tərzdə yazmayın. Sarkazm ustası deyilsinizsə əgər. Mədh də etməyin.

14. Kimisə tənqid edirsinizsə, yazını şəxsiləşdirməyin. Keçmişdə aranızda baş vermiş incikliyi ora salmayın. Şikayət etməyin. Peşmançılıq da bildirməyin. Sizin başqa birisilə olan probleminiz heç kəsə maraqlı deyil. Yazdığınız halda belə kimdənsə paylaşmasını xahiş etməyin. İnsanlar ruhi qida almaq üçün oxuyur. Şikayət dinləmək üçün yox.

15. İnformativ post yazırsınızsa, heç olmasa vikipediyaya baxın. Googleda axtarış verin. Mövzu ilə bağlı bir neçə məqalə oxuyun. Sübut kimi bloq redaktəsi səhifəsində link yerləşdirin. 

16. Ədəbi tənqiddirsə, mütləq kitabı iki dəfə oxuyun. İlk mütaliəniz təəsürat olacaq. İkinci oxunuş təhlil. Bloknot və qələm yanınızda olsun.

17. Təzə yazmağa başlayanların unutduğu vacib detal: Bloq yazısına mütləq foto yerləşdirin! Həm oxuyanda, həm paylaşanda abırlı görünsün deyə.

18. Bloq yazısının başlığı 2-3 sözdən uzun olmasın. Şablondan qaçın. Varsa original söz birləşmələri işlədin.

19. Həftədə azı 1 yazı paylaşın. Yoxsa tez unudulacaqsız.