Good bye, Avropa!

Çoxdandır belə xoş xəbər almamışdım. Avropa Parlamenti və ATƏT PA prezident seçkisinə müşahidəçi göndərməyəcək. Bu xəbərdə xoş olan nədir deyə bilərsiniz. Cavab: HƏQİQƏT!

O həqiqət ki, illərdir demokratik düşərgə görməzdən gəlirdi. O həqiqət ki, yalana çevirib özlərini inandırmışdılar. Camaat arasında axmaq görünməkdən qorxduqları üçün yalanı insanlara da sırımışdılar. Qəzetlərində avrointeqrasiya, NATO-a girmək, ABŞ-a kölə sadaqətli inam başlıca mövzu idi. Əks konteksdə məqalə düşməncə qarşılanırdı. Səsləndirən adam belə rejimin agenti sayılırdı.

Demokratların başı daşdan-daşa az dəyməyib. Ancaq baş da artıq kötüyə çevrilib. Ağrı hiss etmir. Nə 2003 16 oktyabrdan sonra, nə 2005 26 noyabr, nə də 2010 parlament seçkisindən sonra. Halbuki o baş ilk qapazdan ağıllanmalıydı. Deyərdim ki, Qərbin Azərbaycanda QHT-lər yaratmağa başladığı ilk gündən.

Bu vaxtacan Qərb diplomatik yolla başa salırdı ki, qardaş siz mənə lazım deyilsiz. Mənə alver etmək üçün avtoritar rejim lazımdır. Milli marağa zidd istənilən müqaviləyə imza atsın deyə. Mənə kölə xalq lazımdır. Talayanda etiraz etməsin deyə. Mənə cinayətkarlardan ibarət sistem lazımdır. Oğurladıqlarını Avropaya kapital kimi axıtsın. Çox başa saldılar, qanmadılar. Axırda özləri də dözmədilər. Açıq şəkildə dedilər: "O,İlham, o siz. Bacarırsız alın qarşısını saxtakarlığın. Sizi də aldatmaqdan bezmişik. Sadə vətəndaşları başa düşdük. Siyasətçi ki, bu qədər avam olmaz".

2013 prezident seçkisi ilk nümunə deyil. Yadınıza gələr 2010 parlament seçkiləri ərəfəsində ABŞ Azərbaycana səfir göndərmədi. Hardasa il yarımdan çox ölkə səfirsiz qaldı. Elə ki, bütün saxtakarlıqlar tamamlandı, Milli Məclis müxalifətdən təmizləndi, səfir də məlum oldu. ATƏT o seçkidə hədəf  seçki dairələrinə gəlmədi.

Bəs müxalifət mətbuatı nə etdi? Redaktor-politoloqlar səfir göndərilməməsini ABŞ-ın İlham Əliyevə təzyiqi kimi şərh etdilər. İlin əvvəli "Washington Post"da çıxan Dubay villaları məqaləsi ilə başlarını aldata bildilər. Elə o zaman "Beyinlərə atılan bomba" adlı məqaləmdə yazmışdım ki, bu əhalinin əks-reaksiyasını öyrənmək üçün keçirilmiş eksperimentdir. Bənzər eksperiment Gürcüstanda da keçirilmişdi. Hər hansı siyasi təzyiqdən söz gedə  bilməzdi. Ancaq nəticə çıxarmaq əvəzinə qəzet manşetlərində "ABŞ Azərbaycanda inqilab qərarı verdi" başlıqlı məqalələr getdi. Hələ də bənzər açıqlama və məqalələrə rast gəlinir.

Birdəfəlik başa düşün ki, Azərbaycanda avtoritarizm İlham Əliyevin qəddarlığının nəticəsi deyil. Qərbin uzaqmənzilli planlı siyasətidir. Qrantla yüklənmiş saysız-hesabsız QHT-lər yaratamaqla 15 il içində ən yaxşı siyasətçilərinizi partiyalarınızdan qoparan Qərb idi. Polisə müxalifətçini bir gün öncə evindən oğurlamağı öyrədən, dezinformasiya yaymaq üzrə təlim keçən də ATƏT idi. Hal-hazırda internetin izlənməsi, aksiyaların dağıdılması üçün ən müasir texnologiyaları satan da Qərbdir.

Ey binəvalar, birdəfəlik analayın ki, qlobalizmin düşmənləri diktaturalar deyil. Milli özünüdərkə malik azad dövlətlərdir. Mübarək, Ben Ali, Qəddafinin  40 illik azğınlığına göz yuman da eyni qüvvə idi. Gürcüstanda Saarkaşvilini dəyişən Rusiya deyildi. Qərb idi. Səbəbi? 2008 xəyanətindən sonra oriyentasiyasını Qərb deyil, Türkiyə və milli iradə üzərində quran Saarkaşvili vardı. İsrail pilotsuz təyyarə xəyanətindən sonra milli istehsal pilotsuz təyyarələr, raket qurğuları sınaqdan keçirən Saarkaşvili vardı. Korrupsiyada şantaj edilərək xaricdən siyasi təzyiqlə ələ alınacaq siyasətçiləri olmayan Gürcüstan vardı. Yoxsa Rusiyadakı biznesi ilə çoxdan sağollaşmış, Fransa pasportu daşıyan İvanişvili təcili Gürcüstan siyasətinə niyə gətirilirdiki?

Gürcüstan yenə köhnə zamanlarına qaytarılır, yenə cılızlaşdırılır.  Payızda isə yekun zərbə endiriləcək. Mürsiyə endirilən kimi. Avropanın bizlərə avtoritarizmin ən böyük dayağı olmasını anlatması üçün tək yolu qalmışdı. Demokratik düşərgənin üzünə tüpürmək. Yaxşı ki, vəziyyət bu yerə gəlmədi.

Düzdür, bəziləri hələ də özünü inandırmağa çalışır ki, Azərbaycan iqtidarının kürüsü dadlı gəldi. Qardaşımsız, özünüzü gic yerinə qoymayın. Rusiyanın Xəzər, Oxot dənizi, Volqa, Yenisey çayı qara, qırmızı kürü qaynayır. Bizimkilər banka-banka versələr, Putin tonla verə bilər. İlham Əliyevə "Maqnitski siyahısı"nın bir bəndi boyda rəsmi sanksiya tətbiq olunubmu?

Nə isə. Mənim işim yazmaqdır. Kimisə ağıllandırmaq ümidində deyiləm. Çünki kötükləşmiş başlardan ancaq danq səsi çıxar. Good bye, Avropa!