Onun polisi

Amerikanların bir məsəli var: "Hakimiyyət insanı bədbəxt edir". Doğru fikirdir. Ancaq  2 iyun Polis günü ilə bağlı İlham Əliyevin çıxışını dinləyənədək özüm də gözləməzdim ki, bu dərəcə bədbəxt edir. Elə həmin gün Rüstəm İbrahimbəyovun verdiyi müsahibədə "İndiki prezidentə oxşasam, həyatım məhv olar" fikri yerinə düşür. Nə deyib Əliyev?

Deyib ki, 2005-ci il 26 noyabrda uşaq-qadın demədən dağıdılan dinc mitinq mənim göstərişim idi. Edilən vəhşiliyin sifarişçisi də özüm. Cümlələr bu cür olmasa da, o hadisənin fotoları bugünədək durur. İnsanlıqdan çıxmışları cəzalandır - deyiblər ona. O, isə çırtma belə vurmayacağını deyib. 2005 seçki ili idi. Bu il də seçkidir. Əliyev yenə də "Bəyan edirəm ki, polis heç vaxt cəzalandırılmayacaq" deyib. Yəni nə quldurluq eləsə, ona rəvadır. İstəyirsən Hacı Məmmədov ol, bircə özümə dəymə.

Əslində Əliyevin tez-tez belə çıxışlar etməsi faydalıdır. 163 dollar, yağlı yemək videoları bu adama nə dərəcə məzəli prezident obrazı qazandırırdısa, daxilindəki insan nifrətini bir o qədər gizlədirdi. Azərbaycanlılar reallıq hissini unudurdular. Bədbəxtliklərində kimin əlinin olduğunu görmək istəmirdilər.

Hədə-qorxu gəlməklə İlham Əliyevin müxalifətə edə biləcəyi bir şey yoxdur. 10 ildə nə qədər adamı həbsə atdırıb. Hər cür zorakı, iyrənc şantaj metodları işlədilib. Müxalifət yenə yerindədir. Yenə mübarizədədir. Əks halda Əliyevin əsəbləri bu qədər pozulmazdı. Yerli-yersiz hər çıxışında müxalifətə nifrət qusmazdı.

Şəxsiyyəti isə sürətlə deqradasiya edir. Atası Heydər Əliyevdən ona kreslodan başqa heç nə qalmayıb. Nə natiqlik, nə şanlı keçmiş, nə xarizma. Jurnalistlə, sadə camaatla sərbəst danışmaq hövsələsi belə yoxdur. Rəqabət gücləndikcə əksikliklər əzir. Gizlənə biləcəyi tək arxa polis, qorxuda biləcəyi tək qüvvə zəncirli köpəkləridir. Yox, onlar metroda, PPX-də xidmət edən sadə polislər deyil. Kimlərdir onlar? Mülki qoçular, işverənlər, üzəduranlar, sadistlik arzusu ilə yaşayan uniformalı manyaklar.

Polisi nə qədər alçaltsaz da, bir fakt faktlığında qalır. Mal yiyəsinə oxşayan kimi ölkənin polisi də dövlət başçısının xasiyyətini alır. Ortada Saarkaşvili polisi nümunəsi, bir də İlham Əliyev polisi var. Söhbət üstünə bu yaxınlarda Qaraşəhərdə evləri sökülən vətəndaşlar və polis arasında maraqlı dialoq yaşanmışdı:

Sakinlər: Allah prezidentimizə can sağlığı versin. Polisləri öldürsün. O yazığın xəbəri olmadan evimizi sökürlər.
Polis: Həyeee, həəə... Özümə villa tikmək üçün sökürəm də... (gülür)

İlham Əliyevə çoxlu belə çıxışlar arzulayıram. "Prezident yaxşıdır, ətrafı pis", "Prezidentin qanunsuzluqdan xəbəri yoxdur" deyən axmaqların ağzından öz əli vursun. Başa salsın ki, sizi bədbəxt günə salan elə mən özüməm, ay yazıqlar! Polis artıq bunu başa düşüb. 

Bir şeydə narahatam. Əliyevin sonunun Mübarəkdən daha faciəli bitəcəyinə. 2 milyon polisi Mübarəki Təhrirdə tək qoyub yoxa çıxdı. Mübarəkin şərəfini qurtaran ordu oldu. Şərəfli hərbçi keçmişinə görə. Əliyevə arxa duracaq ordu belə yoxdur. İndi baxaq İlham Əliyev kimləri cəzalandırmayacaq.

Onlar cəzasız qalacaq

Bunu edənlər də...

Sizə daha iyrənc fotolar göstərmək istəmirəm. Hər kadr onun cəzasızlıq diktəsini daha da gücləndirir. Çıxışında başqa maraqlı cümlələr də işlədib.  

 “Satqın, antimilli ünsürlər” özlərinə “böyük qardaş” axtarışındadır".

 

"Öz şəxsi maraqları naminə kim olsa əlini öpməyə, qarşısında diz çökməyə hazırdırlar"

"Lakin xalq müdrikdir, hər şeyi görür. Kimin müstəqilliyin qarantı, kimin satqın olduğu hamıya aydındır". İlk dəfə eyni fikirdəyik, cənab prezident. Bəli! Xalq görür.