Xədicənin köstək aksiyası

Yox, bu dəfə jurnalist Xədicə İsmayılı tənqid etməkdən uzağam. Avqustun 2-i Nizami metrosu yaxınlığında jurnalistlərin "Xədicəyə dəstək" aksiyası oldu. Hər cür idiotik aksiya ağlımdan keçirə bilərdim, amma "Xədicəyə dəstək" yürüş aksiyasını yox.

Həbsdə olan jurnalist üçün keçirilən aksiyanı başa düşə bilərəm. Məqsəd jurnalistin azadlığa çıxmasıdır. Ya bu... Dəstək nəyədir? Xədicənin etdiyi hərəkətəmi, ya Xədicə olmaq istəyimi? 

"Femen" qızları kimi iki nəfər çıxıb hərəkət etsəydi, deyərdim hə, budur aksiya! Kiminsə real dəstək göstərmək istəyi varsa, çəksin videosunu, qorxmadan paylaşsın. Tabuları qıraraq rejimə meydan oxusun. Hər zaman rejim çəkib göstərəsi deyilki. 

Aksiyanın şüarlarından biri: "Mənim evim, mənim yatağım korrupsiya deyil". Balam, sizin yatağınız Emin Millinin evidirsə, İlham Əliyevin yatağı da Çovdardır, Dubay villalarıdır. Sizlər ordan korrupsiya çıxardanda, günün biri o, da kino çıxarmalıydı.

Kadrlara dəfələrlə baxdım. Aksiyada Xədicənin işçilərindən (kimisi üçün dostları) heç kəsi görə bilmədim. Ancaq bir nəfərin hay-həşiri eşidilirdi. "Mən aksiyaçı deyiləm, mən avtobusa minməyəcəm". Sifətin görə bilməsəm də, bir yerdə ağzından qaçırdı ki, Azadlıq radiosunun işçisidir. Digər aksiyaçılar Sabirabad qarpızı deyil ki, avtobuslara dolduralar. Aksiya sənin şefin üçün keçirilir, min avtobusa, dəstək ol!

Xədicənin işçilərinin orda olmamasını aksiya iştirakçısı bir xanım belə izah etdi ki, radionun baş ofisi aksiyaya qatılmağa icazə vermir. Paradoks - radionun adı Azadlıq, amma işçisinin aksiyaya qatılmaq azadlığı qadağa altındadır. Xədicə siyasətçi deyil, siyasətə də iddialı olmadığını bildirib. Bu səbəbdən aksiyanın siyasiliyindən söhbət gedə bilməz.

İşin siyasiliyi bəhanədir. "Əsgər ölümünə son" aksiyasında jurnalist "kruq"u ilə kolon halında iştirak edən Xədicə burda niyə gözə dəyməsin? Hesab edək ki, özünün iştirakı məqbul deyil. Bəs ətrafı?

Cəmi  iki həftə öncə "Azadlıq" qəzeti borclarının ödənilməsi ilə bağlı Qasidin qarşısında akiya keçirmişdi. Qəzetin hansı vəziyyətdə olduğunu hamı bilir. Ay olmur ki, qəzetə qarşı yeni absurd məhkəmə iddiası qaldırılmasın. Hər birinin cəzası 30 000 manat. Satdıqları qəzetin halal pulunu da vermirlər. Qəzetin əməkdaşlarından başqa heç bir jurnalist o aksiyada iştirak etmirdi. Şahvələd Çobanoğludan başqa. Şahvələd bəy "Azadlıq"da köşə yazsa da, mən onu hər zaman müstəqil jurnalist saymışam.

Aksiyada Xədicənin işçilərinin olmamasının iki səbəbi ola bilər. Ya Xədicədən o qədər zəhlələri gedir ki, getmək belə istəməyiblər. Ya da aksiya Xədicənin özünün vecinə olmayıb. Bunların heç biri önəmli deyil.

Sözüm sizədir - siyasilər, gənclər təşkilatları, jurnalistlər. Bir şey olmamış özünüzə əl qatırsınız. Bəyanat, hay-küy, aksiya. Bilmirəm bunu radioda efir vaxtı almaq üçün edirsiz, ya bir qazandan dolma yediyiniz üçün?! Amma başqalarından hörmət görmək istəyirsinizsə, özünüzə hörmət qoyun. Yoxsa elə "tryapka" münasibəti görəcəksiniz.

Bu qədər minusun içində bir plyus o oldu ki, axırki yaşıl jiletliləri də aksiya iştirakçısı kimi gördük.