Xocalı bataqlığı

Yenə Xocalı, yenə qaramat, ay brat, ay brat! Xocalı faciəsinin ildönümü hər il eyni cür keçir. Ziyarət, televiziyada ağlaşma, sosial şəbəkələrdə uşaq cəsədlərindən fotolar paylaşan gənc sadomazaxistlər. Dəyişən bir şey yoxdur. Vətənpərvərlik adına xaricdə yuyulan çirkli pulların artan məbləğindən başqa.

Hələ xaricdə oxuyan qızlarımızın hər 26 fevral çıxardığı oyunları demirəm. Təbliğatın üstündə dayanmayacam. Onsuz da hər şey saxtadır. Seçki saxta, qanun saxta, tökülən göz yaşları saxta. Xocalının müharibə cinayətindən genosidə necə çevrildiyini hələ də anlaya bilmirəm. Daha irəlisi, bu genosid oyununun Azərbaycan üçün gələcək təhlükəsini görürəm.

Liditse, Xatın - hər biri II Dünya müharibəsinin Xocalısıdır. Bu yaşayış məntəqələri yerlə-yeksan edilib. Əhalisi son nəfərəcən güllələnib. Amma heç biri genosid sayılmır. Qətliama görə Çexiya və Belarusiya heç vaxt Almaniyaya genosidin tanınması ittihamı irəli sürməyib.

Bəs bizə nə olub? Əvvala deyim ki, azərbaycanlıların siyasət adına heç bir gələcək siyasi planı olmur. Diplomatiya adına nə edilirsə ermənilərin, Rusiyanın yamsılanması şəklində edilir. Adamlar baxıb qərar veriblər: erməni diasporunun "genosidi" varsa, bizim niyə milli genosidimiz olmasın?

Bu məntiqlə bostan tərəvəzi də olmaq olar, seqreqasiyaya məruz qalmış zənci də. Soyqırımda müəyyən şəxslər günahlandırılırsa, onlar müharibə cinayətkarı  sayılır. Hərbi cinayətkarlar həbs edilərək beynəlxalq məhkəməyə çıxarılmalı, ya da İsrail nümunəsində ifşa edilərək məhv edilməlidirlər. Yox əgər cinayət subyekti kimi dövlət göstərilirsə, genosidin dövlət siyasəti olduğunu sənədli şəkildə sübut etmək şərtdir.

Bədbəxtçilik ondadır ki, Xocalıya girən erməni silahlıları Azərbaycan ərazisində yaşayan etnik ermənilər idi. Azərbaycan dövlətinin vətəndaşları idi. Laçın dəhlizi hələ işğal olunmamışdı. Dağlıq Qarabağın Ermənistanla birbaşa əlaqəsi yox idi. Belə çıxır ki, ya Ermənistan gecə ilə ora havadan desant tökmüşdü, ya da bir gecədə onların  hamısına Ermənistan pasportu verilmişdi.

Qətliamda silahlı qüvvə kimi iştirak edən yeganə xarici dövlət Rusiya və 366-cı alayı idi. Hüquqi cəhətdən dövlət subyekti kimi ittiham edə biləcəyimiz tək tərəf də elə Rusiyadır. Amma nə əvvəllər, nə də indi Əliyevlər ailəsinin Rusiyanı nədəsə ittiham etməyə hünəri çatmayıb. Üstəlik hadisə ilə bağlı Rusiya vətəndaşlarının adı beynəlxalq qurumlara göndəriləcək sənədlərdən çıxarılıb.

Rusiya cəhənnəmə! Cinayətkar istəyirsiz, alın sizə Köçəryan, Sarkisyan. Azərbaycan tərəfi bu adamlara qarşı heç vaxt rəsmi ittiham irəli sürməyib. Uzağı 5-6 qocanı AzTV-ə çıxarıb erməni söydürüblər. Xocalı qətliamında əli olan Sarkisyanla xizək sürən, görüşlərdə hırıldayan İlham Əliyevin fotolarını istədiyiniz qədər tapa bilərsiniz. Və bu dövlətin başçısı Xocalını dünyaya genosid kimi sırımaq istəyir. Gülməli deyil, gülüncdür.

Yadınıza gələrsə, 2000-ci ildə Arif Rəhimzadə Xocalı cinayətkarlarının adı olan siyahını Milli Məclisin müzakirəsinə çıxarmışdı. Siyahıda 17 nəfər azərbaycanlının adı vardı. Köçəryan, Sarkisyan, Rusiya tərtəmiz qalmışdı. Xocalını üçüncü dünya ölkəsi Meksika, Kolumbiya parlamentində tanıtmaqla deyil. Sabah məsələni beynəlxalq tribunala çıxarsan, bu sənədləri dürmələyib Azərbaycan tərəfinin ağzına soxarlar. Erməni silahlı birləşmələrinin Azərbaycan vətəndaşı olması bir yana, üstəlik etnik azərbaycanlılar da genosid icraçısı imiş. Alın, bu da sizə "Genosid".

Mediada Xocalıya genosid desinlər, ya müharibə cinayəti fərq etməz. Amma məsələnin bu şəkildə dünyaya tanıtdırılması Azərbaycanın özü üçün qazdığı quyudur. İsrail nümunəsini götürək. Bu dövlət Xolokostdan başqa heç bir genosidi tanımır. Xolokostun özü belə İsrail dövlətinin yaranmasından öncə qəbul edilmişdi. Düşünmək olardı ki, yəhudilər özləri qırğına məruz qalıb. Başqa xalqları başa düşüb, onların faciəsinə şərik ola bilərlər. Milli genosidləri tanıyarlar. Ancaq bu olmur.

Məsələ ondadır ki, İsrailin dövlət siyasətini başıboş qənirələr yox, gələcəyi hesablayan praqmatiklər müəyyən edir. İsrail özü müharibə şəraitində yaşayan dövlətdir. Müharibə şəraitində isə  hərbi cinayətin törədilməməsi qeyri-mümkündür. Mülki əhaliyə atılan hər güllə, dağıdılan hər kənd hərbi cinayət əməlidir. İsrailin bugünədək törətdiyi yüzlərlə müharibə cinayəti var. İndi hər iddiaçı xalqın milli genosidini tanısa, sabah öz etdiklərini də genosid kimi tanımaq məcburiyyətində qalacaq.

Sabah Azərbaycanı geridönüşü olmayan müharibə gözləyir. Bu artıq müdaifə yox, hücum müharibəsi olacaq. Dağlıq Qarabağda Livandan, Suriyadan gəlmiş "boyevik"lər döyüşməyəcək. Qarabağda doğulmuş, oranı vətəni sayan yerli erməni əhalisi və həmin əhalidən təşkil olunmuş özünümüdafiə dəstələri döyüşəcək. Atəş nöqtələrini susdurmaq üçün isə yaşayış məntəqələri artileriyya, qrad atəşinin altına verilməli, kəndlər yerli-yeksan edilməlidir. Azərbaycan ordusu ABŞ ordusu deyil ki, hədəfi 1 metr dəqiqliyəcən vura bilə roket kompleksləri, kosmik idarəetməsi olsun. Və mülki əhalinin öldürülməsi iddialarından yaxa qurtara bilsin.

Bugün bir Xocalını genosid kimi müzakirə ediriksə, sabah qabağımıza beş-altı "erməni Xocalısı" faktı qoyacaqlar. Özü də bu "Xocalı"ların icraçısı hansısa etnik "boyevik"lər yox, Azərbaycan dövləti olacaq. Bax, budur təhlükə! Budur Xocalı bataqlığı.

Hələki heç kəs baş verənin fərqində deyil. Ancaq xərçəng şişinin ucu görünür. Keçən il Kaliforniya senatorlarından biri "Sumqayıt hadisələri"ni genosid faktı kimi tanıntdırmaq üçün yerli qanunverici orqana təklif vermişdi. 6-ı azərbaycanlı olmaqla, 32 nəfərin öldürüldüyü xırda etnik münaqişə və genosid.

Təəccüblənməyin. Genosid oyunu bu tempdə davam edərsə, Sumqayıt da tezliklə Xocalı olacaq. Tükiyənin bu vaxtacan "erməni genosidi"nə qarşı "türk genosidi" arqumenti ilə çıxış etməməsinin tək səbəbi sağlam siyasi məntiqdir.  Azərbaycan isə.. Azərbaycan isə, bir repdə deyildiyi kimi "bunlar hamısı boş başlar, rüşvətxor oğraşlar, şərəfsiz rejimdə yaşayan qul vətəndaşlar".