Başlanğıc...

Paz-zollayaninin köşəsi

четверг, 13 июня 2013 г.

Zoraki türklər


1 iyundan bu yana Gezi parkı hadisələrini izləyərək  anlamağa çalışıram. Türk  gəncləri nə istəyir? Gəldiyim yekun qənaət o oldu ki, bunlar nə istədiklərini belə bilmirlər. İstanbulda olma imkanım olmadığından hadisələri internetdən, insanların düşüncəsini facebook səhifələrindən izlədim. Tayyip Türkiyəni iki yerə böldü deyirlər. Fikir fərqi olaraq türk gənci iki yox, ən azı on yerə bölünmüşdür.

Ağac deyərək etiraza qalxdılar. Sonra ağac bəhanə deyib, "Tayyipe istifa!" qışqırdılar. Yürüş etdilər. Elə ki, Taksim meydanına daxil oldular, içki içərək bayram etdilər. Hökümət düşürmək ağıllarından çıxdı. Məlum oldu ki, bu gənclikdən inqilabçı çıxmaz. Gezi Parkına çəkilərək hippi həyatına davam etdilər. 



Hökümət düşürmək istəyən adam polisi evinəcən qovar. Dövlət binalarını bir-bir oda verib, güc mərkəzlərini panikaya soxar. Misir inqilabında polisi meydandan təmizləyən "çapulcular" polis evlərini soymağa başladı. Polis öz evini qorumağa çəkilincə Mübarək tək qaldı. Bəs Türkiyədə nə edirlər?

Solçu quruplar polislə dirənərkən millətçi gənclər meydana girib "Polise kalakan eller kırılsın" deyə sloqan atır. Soruşsan nə üçün burdasan? hər iki tərəf deyəcək ki, hökümətə qarşıyam. Müxalifliklə polis sevgisi bir arada ola bilməz. İnsanlar arasında polisin hörməti itdən aşağı olmadısa, o ölkədə inqilab ola bilməz. Erdoğan "Benim polisim" deyirsə, Türkiyədə artıq vətəndaşın polisi yoxdur. Hökümətin mühafizəçiləri var. Gəl bunu türk insanına anlat. Hələ də qəflət yuxusundadır. 



Polis və hökümət tərəfdarlarının etirazçılar əleyhində paylaşdığı bir video var. Məktəb yaşında gənclər polis barrikadasının üstünə molotov kokteyli atır. Qalxanları təpikləyir. Bu an etrazçılar içindən çıxan bir kişi özünü polisin qabağına verir. Türkiyə bayrağını asır. Bir qism polislə savaşarkən, digər kəslər polisi müdafiə edir. Amma hamısı etirazçıdır. Bu səhnələr bəlkə də türk milli pornoqrafiyasının şah əsəridir. Bu şəkildə bölünmüş insanlarla polisə, hökümətə qalib gəlmək olarmı?

AKP ilə MHP-nin siyasətinə baxarsaq başörtüsü, islam, generalların həbsi mövzusunda hər ikisi eyni fikirdə. Bircə kürd məsələsində düşmən olarlar. Öcalanın MHP höküməti dönəmində canını kəndirdən qurtardığını nəzərə alsaq, onda da eynilər. Bəs niyə Erdoğana qarşıdır bu ülkücülər? Dediklərinə görə Turan istəyirlər. Bunlar  öncə Rusiya marioneti olan digər türk dövlət başçılarını dəstəkləməkdən imtina etsinlər. Sonra Turan istəsinlər.

Dikatura yolu tutan hökümətlər ya seçki ilə gedər, ya darbe ilə. Menderes darbe (hərbi çevriliş) ilə getdi. Səhifələrin birində "Erdoğanın yerine Kenan Evrenmi gelsin?" sualına "eləsini də istəmirik. Allah vursun onu" deyə cavab verirlər. Bəs kimi istəyirsiniz? Atatürk deyirlər. 

Allah bir daha heç zaman Türkiyənin başına Atatürk kimi adam gətirməsin. Çünki Atatürklər İstiqlal savaşlarında ortaya çıxarlar. Türkiyə bir daha İstiqlal savaşında döyüşməyə məcbur qalarsa, bunun günahı türk insanında olacaq. 

Türkiyə əsla bir Avropa dövləti, layik (dünyəvi) ola bilməyəcək. Milyonlarla pərəstişkarı olan "Muhteşem yüzyıl" serialını izləyən xalq gələcəyini Cumhuriyyətdə deyil, xilafətdə görəcək. Atatürk zorla bunları dünyəvi etdi. Çoxpartiyalı sistem yaratmaq istədi. Partiya yaradan "Təkbir!" sədaları atan qara kütlə ilə dövlətin üstünə gəldi. Partiyanı qapatdı. Adını diktator qoydular. 

Türk insanına nə zaman azadlıq verildisə, Avropaya yox, şəriətə cumdu. Hər 10 ildən bir darbe vurmaqla onlardan adam edirdilər. Amma 1997-dən sonra təkrarlanmayınca yenə özlərinə qayıtdılar. "Bu Cumhuriyyet tekbir sedaları ile kuruldu" deyən müxalif gənclikdən Erdoğana rəqib ola bilməz. Çünki təkbir səsi yüksəldikcə, Atatürkü nutku susacaq.

Türkiyə islamlaşırmı? İslamlaşmır. Sifətsizləşir. Nə istədiyini bilməyən, bəlli siyasi hədəfi olmayan başıpozuq insanlar ölkəsinə çevrilir. 20 il əvvəl türk siyasəti daha bəlli idi. Azerbaijan-Azərbaycan səhifəsində çox gözəl bir status paylaşılmışdı. "Cüppeli iblisler, kravatlı imamlar ülkesi Türkiye". 

Ancaq reaksiyalar necə oldu? Beyinsiz azərbaycanlı, türkiyəli gənclər "Bu nə söz. Qardaşlığımızı pozursuz" deyə etiraz etdilər. Bu sözün ertəsi günü Valide Sultan camisinin imamı Erdoğanın yalan danışdığını dedi. Çapulcu yox, bir imam! Bu da qapaq olsun. İndi Türkiyə özü qərar versin. İblis kim, imam kim? İslamlaşırmı, sifət dəyişdirirmi?

Gezi parkında oturan gəncliyə gəlincə. Bunlar Türkiyə siyasətinə heç bir aidiyyatı olmayan gənclikdir. Zatən nə olduqlarını göstərdilər. Höküməti istefaya göndərmək əvəzinə parkda hippi həyatı yaşamağa başladılar. Sanki Gezi parkından başqa Türkiyə yoxdur. Bir neçə il öncə "Abbas Güçlü ile genc bakış" proqramına çıxan bu gənclər kəkələyərək danışırdılar. Sualı kağızdan oxuyaraq verirdilər. Dedikləri də telekanalların dili. Çünki bütün günü başları "msn"dən ayrılmırdı. Nə yaxşı ki, Skype çıxdı. Nitqləri düzəldi. Allah eşqinə bunlardan siyasətçi, natiq çıxarmı? Erdoğana, Kılıçdaroğluna rəqib olarmı?



İnternet səhifələrdə caps paylaşan, söyüşlü statuslar yazan, düzgün danışa bilməyən gənclik birdən-birə meydana düşdü. Polis geri çəkilincə özünü hər şeyə qadir saydı. Halbuki heç nə dəyişmək gücündə deyil. Generalların, jurnalistlərin azad olmasını belə siyasi tələb kimi qoymadı. Polisə gül verməklə, yerdə uzanıb kitab oxumaqla qarğaları güldürmək olar. Siyasi mübarizə aparmaq olmaz. 

Müxalif düşüncəli birisi olaraq hər zaman hökümətlərə qarşı olmuşam. Amma Erdoğan Gezi parkında toplaşanları darmadağın etməlidir. Yoxsa bu gəncliklə Türkiyə siyasətinin gələcəyi yoxdur. Unutmayın! Seçkini baykot etməklə evdə oturan, Erdoğanın baş nazir seçilməsinə imkan yaradan da bu apolitik gənclik idi. 

Türkiyədəki partiyalara gəlincə. CHP Türkiyəni əhatə edəcək gücdə deyil. Partiyanın gənclik siyasəti də zəif olduğundan bir şey edə bilmədi. MHP qorxaqlıq göstərərək özünü meydanlardan kənar tutdu. Türkiyə siyasətində bu dəqiqə hörmət ediləcək bir siyasi güc varsa, o da BDP-dir. Bəlkə Diyarbəkirdə türk insanının gözündə terroristdirlər, ancaq İstanbulda meydanda demokratiya mücahidləridir. Gezi üçün ilk qurban verən də BDP millət vəkili Sırrı Süreyya Önder (əslən azərbaycan türküdür) oldu.



Qarşımızda nə istədiyini, nəyə qarşı olduğunu bilməyən Türkiyə var. Guya hər kəs Erdoğana qarşıdır. Amma siyasi hədəfləri olmadığından nəticədə hamısı Erdoğana dəstəkdir. Türk gəncinin önündə bir yol var. Gezi parkındakı, Taksimdəki hippi gənclik ya ciddi siyasətə girəcək, ya da qaz bombasının dumanı altında yox olub gedəcək!

Комментариев нет:

Отправка комментария