Ovçu, çıxart kostyumu

             Bir əvvəlki yazımda yazmışdım ki, həftə olmur ki, Əli Həsənov hər hansı açıqlaması ilə ictimaiyyətə məsxərə olmasın. Səhv etmişəm. Plan artıq günlük normaya keçib. Gülmək üçün yetər ki, mətbuatı izləyin və növbəti günü gözləyin. 

  Dekabrın 26-da “Media forum” saytının “Azadlıq” qəzetinin ad günü məclisinin yarımçıq qalması ilə bağlı sualına cavab verərkən belə deyib: “Cənab prezident İlham Əliyev dekabrın 24-də cəbhə bölgəsinə səfər edib, məcburi köçkünlər üçün salınan qəsəbənin açılışını edib. “Azadlıq” qəzetinin bu səfərlə bağlı yazdığı məlumata baxın. Yazıblar ki, prezident göl qırağına ova gedib. Kostyumda, qalstukda ova gedirlər?” Ən axırda dözməyib paxlavanı ağzından çıxarıb: “Belə qəzetin işığını da söndürərlər, hələ o yana da keçərlər.” Bax belə.

Türk atasözü var: “Yalançının şamı yatsıya qədər yanar” Əli müəllim 5 dəqiqə belə dözə bilməyib. Kim nə deyir desin, bu sürətlə inqilabı bu kişi edəcək.

Keçək məğzə. Ov eləmək nə vaxtdan yaraşmaz hərəkət olub? Oğuz elinin qədim adətidir. “Milli dəyərlərimizə sadiqiq” deyən sizlər deyildiz? Hər halda ilin bu vaxtı göl qırağına çimməyə də getməzlər.

Kostyumda ov etmək olmazmış. Niyə? Kostyum da qandal deyil ki, 2 aprel məhbuslarının biləyinə keçirəsən. Günün günorta çağı bir əmrlə Əvəz Zeynallı kimi jurnalisti kostyumda ovlatdırmaq olur, amma göl qırağında ov eləmək olmur?!

Açıqlamadan belə görünür ki, prezident hər işi kostyumda görür. Kostyumda açılış edir, kostyumda avtobus sürür, turnikdə çəkinir. Bir sözlə, hər yerdə kostyum. Axı insan yatanda, istirahət edəndə belə bu kostyumu çıxarmalıdır. SSRİ avtoritar üsulları bu insanların beynində qəlpə kimi ilişib qaldığından, kostyum da əyinlərində qəfəs kimi durur.

Müxalifətə nifrət edirsiz. Aydındır. Qərbi dinləmirsiz. Bu da sirr deyil. O zaman gözünüzü açıb səcdəgahınız Rusiyaya-Putinə baxın. Ovda olmaq, kostyumsuz, elə yarıçılpaq gəzmək insana necə yüksək imic gətirir, öyrənin. Seçkini saxtalaşdırmanın hər yollarını öyrənirsiz ki.

Putin ovda - Kostyumsuz

Putin göldə - Şalvarsız

Putin balıqda - Qalstuksuz

Sadə rusun gözündə Putin - əsl kişi, rus mujiki.